| 今天開始是實習準備週，雖說是準備週，但還有兩天要上課。
PGDE 課程的確不同大學的課程，上八星期課就要進行實習，因為只有實戰我們才能獲得真正的教學經驗，才知道當一位老師的感受。上中文教學法，從何教授身上學得最多的是「做人」和「愚公精神」，希望我也能多大膽嘗試。
之前大約兩個月的上學日子，我都是十分悠閒的。可是，愈悠閒就變得愈懶惰，完全沒有好好利用時間，而且，對於很多事情，我都沒有盡全力去做好，大概只花了七八成的努力。對於一些我願意付出100%去做去想的事，也會因為不同的因素而叫我搖擺不定和感到不安，我就只剩下一顆堅持的心了!
今天到實習學校見校長和老師，不知為何真的有點緊張。在等待期間，有一位男老師問我：「你是家長嗎？」，我立即回應說不是，告訴他我的身份。那一刻感到有點無奈，心想我的樣子很老嗎？再想一想，或許我就不用太擔心學生會覺得我不像老師吧。面見副校長、科主任、兩位原任老師，知道任教中一及中二，也鬆一口氣。幸好遲一點也有兩位教院的實習生，否則我真是要孤軍作戰了！被交代了一大堆工作，拿著十多本教科書，我的教學工作將於下星期展開。一星期十四節課，跟真實老師比較的確不算辛苦，但要被別人觀課，壓力一定很大。 心理準備好像還未有，實際準備工作更加未開始，一星期後的我，要如何走進班房，要如何介紹自己，要如何教學，要當一個怎樣的教師，一切一切都令人不禁擔心起來。這種不知所措的感覺，或許是考A-LEVEL時有過。一個月教一個單元，還有默書、測驗及功課等，相信比考A-LEVEL更難。
11月，我不可能再浪費時間，因為我要實習、做義工、做多份功課、學日文和做兼職等，對於實習，我一定要盡心盡力去完成。我知道即使我付出很大，回報也未必成正比的，也應該會遇到很多挫折和頑劣學生，努力吧！    
|
| |
| 無啦啦傷風，覺得今年身體真係差左，好似睇多左幾次醫生咁。
前幾日想睇醫生時發現我一路睇左十幾年既醫生因為租約問題而唔做，唯有睇另一個醫生。
食左藥，累到死，但其實無乜效。
中大PGDE返學既日子就快結束了，11月9日至12月5日就係實習既日子，一個月的實習，係我地既實戰，我諗一定會係一個好既體驗。實習期間，仲有無數科目既PAPER要交，我仲要做東亞運動會既義工，應該都會幾忙。好難想像自己教書的樣子，希望可以盡力教好學生啦。之前上Paula堂，佢播左套名校到底應唔應該轉做直資學校的片俾我地睇,又叫我地諗下到底教育係「教『好學生』」定係「教『好』學生」？我覺得教育的目的是「教『好』學生」，應該盡量給予公平既機會俾每一位學生。本身好既，教得好係錦上添花，本身普通或者壞既，更需要老師去教好佢地。有錢人本身在各方面已經比普通人得到更多，在教育方面，應該要一視同仁。
近日同朋友食飯行街，發覺她的聲音真的變得很沙啞，一邊教學一邊讀書，或許真的很大壓力。不用補課不用上課對她來說已是幸福的一天，看來我真的要有心理準備，教學工作真是一份沉重的工作。另外，今年畢業的朋友也陸續找到工作，真的太好了，特別恭喜阿仙搵到一份自己鐘意既工。
或許之前把某些事放得太大，卻沒有為自己獲得的而感到滿足。仔細想想，回憶還是給予我信心。
何度も考えても、やっぱりありがたい。本当に嬉しかった。
|
| |
| 星期五終於出左實習學校的名單，但就搞到我十五十六，好煩！
我一早都估到會有梁文燕的，但無諗過要在一個鐘內決定好揀邊間
三間都在大圍，梁文燕有兩個位，劉伯樂得一個位，真係唔知揀邊間好。
揀梁文燕既話，我就可以好熟悉個環境，亦都可以見番舊同事，好開心，而且個banding 好d，又有同學陪，但就身份尷尬，好似好怪咁，好難將自己定位。
揀劉伯樂既話，就係一個全新既開始，樣樣都新，banding 較差，自己一直都讀band 1既中學，對住d band 2尾band 3既學生，真係有d 擔心。
兩個舊同事都叫我返梁文燕，但我的同學都認為咁樣唔好，而我自己一開始都唔想返，但諗到有熟悉既環境又想返。
最後，我揀左劉伯樂，第一次實習好似去一間全不認識既學間好d，亦多d機會睇多d，我亦都唔想花時間去調整身份同心情，一個人在一間新學校實習，對我黎講真係一個好大既挑戰。
Joanna 在放工前打黎關心我，真係好warm，但我唔返梁文燕真係唔想受過多保護，出外闖闖都好既。之後又收到中文科主任既電話，但我都無主動提實習既事，我怕佢會狂叫我返去。但一切都成定局，我希望呢個冒險精神可以維持好耐啦！
|
| |
| 不知不覺返學已經一個月了，頭兩個星期未能習慣，兩個星期後居然完全習慣了。
星期一day off
星期二由八半上到四點二，仲要有兩堂係唔太鐘意上的，食飯又無時間，只能食三文治。
星期三同星期五上中文主修，好快過，上完就走得。
星期四朝早有堂，雖然都係八半，但好鐘意個教授講書，佢成日用econ同bussiness的角度來分析schooling，好特別。
以前讀中大既同學又會話我知好多野，真係好！
cc can 既頹飯真係唔算好頹，只係11蚊 ，好抵，但唔可以成日食，因為佢既餸係蛋、腸、餐肉同火腿，哈哈。
近日為左微格教學做咩topic好苦惱，好彩最後都俾我諗到做咩，希望快d到星期三啦，我想快d完，放下心頭大石。
上星期日終於可以幫阿粉同Esther慶祝生日了，都過左成半個月先慶祝。或者真係各有各忙的關係啦，發覺要約齊咁多人出黎真係唔係咁易，當約到又有d突發事發生，所以搞搞下就過左半個月，真係辛苦阿仙成日做聯絡。最後我地去左大埔燒烤王BBQ+追月，大家晏畫四五點就入到去，阿粉仲帶埋ＢＢ（一隻狗仔）黎，好耐無見過佢了，果然大個仔左好多。之後去左個小小既泥灘散步，去過幾次都係夜晚，所以唔知有D咁既地方。之後開始bbq，今次可以慢慢燒真係開心。燒左一陣，阿蕭、阿粉、阿龍同Esther忍唔住要打麻雀，燒烤場居然有麻雀租，真係掂。我同其他人食飽飽就去左遠d既地方點下蠟燭、飲下汽水、賞下月同傾下計，大家乜都傾一餐，工作呀愛情呀旅行等等，或者當脫離學生身份既大家，意味着要面對社會，要煩既事真係好多。大家傾到唔想停，平時食飯都係好趕，今次真係好難得呢！自從讀左中學，我都無同朋友過中秋，最後我地仲玩埋紙燈籠，真係充滿童真，但我真係由細到大都好鐘意紙燈籠的。最後，我地成11點幾先走，真係盡興而歸。     
|
| |